قصيدة أقسام المنتدى

دخلت العام يا ناس وحار إختياري = مواضيع وإلا درر كيف أبدي إفتخاري
دخلت الإسلامي وقلت بسم الباري = علوم وأحاديث من صحيح البخاري
ذكرت الله مع الذاكرين ليلي ونهاري = يارب يا مقيل العاثرين أقل عثاري
سباق منتا ماشي ولا انتا جاري = سباق نحو الجنان السباق فيه بأذكاري
المحتاجين محتاجين دعاء إظطراري = والمرض طهور من كل ذنوبي وأوزاري
عندنا نقاش إجتماعي ثقافي حواري = نقاش هادف نقاش بناء نقاش حضاري
أنا في تفسير الأحلام لماما الحبابة ساري = بتتزوج أربعة حريم يا إكس وتخّلف ذراري
طلبت الترحيب وما طال إنتظاري = هلا البيت بيتك عرفت إني بداري
رحت أدون عني وعن أصحابي وجاري = ما دسيت شي كتبت كمان كل أسراري
ثرثرت بثرثرة الأرواح وحطمت أسواري = شخمطت لقيت الرد مغلق شخمطت بجداري
في الكرسي قيدوني عن يميني وعن يساري = بأعترف أحسلي علشان يفكو حصاري
في النكت صرصورة جارتي طلقت صرصاري = لييييش ؟ لانو ما سجل باسمها المجاري
حرب التماسيح والسحالي شرس وضاري = في الألعاب سحلية عورتني مين يآخد بثاري
إن كنت دايم تعشق صيد البراري = صور وعجائب تغنيك عن طلعة الصحاري
دليل سياحي عن الوديان وعن القفاري = يا ابويا عيش حياة البراري عيش سفاري
أحداث قضايا ساخنة قسم إخباري = قريت العجب وشفت اللي مخفي عن أنظاري
أفلام كارتون أنايم هي يا صغاري = شجعوني سأقضي على الأشرار وأعلن إنتصاري
ليرن إنجلش آند بي ريدي تو كاري = سومثينغ تو ذا فيوتشر سومثينغ نيسساري
دونت بانيك إز تو إيزي نوت سكاري = إن ماي فورم إتز ماجيكل آز لايك أا هاري
دخلت الفن أطرب على أوتار جيتاري = أسمع وأطبق مع اللحن عزف أوتاري
استاري آكاديمي أنا جالس أصوت لإستاري = بالغلط رحت أصوت لرولا والأستادة ماري
بأصير ممثل وأستشير الأعضاء في أدواري = في الأفلام أصير مشهور والناس تقرأ أخباري
أتفرج أفلام عربية في فنها مين يجاري = عن الحاضر وعن التاريخ أيام العبيد والجواري
شفت فلم مرعب إندسيت ورى ستاري = أفلام أجنبية شي آكشن شي خيالي وشي دماري
أكره التحميل وأدعي عليه بالسم الهاري = أروح أتفرج أونلاين وأجهز عصيري وفشاري
نفسي أتفرج فلم بس ما معاية مصاري = طلبات الأفلام بلوشي أطلب كل اللي في طاري
في الكورة أصيح بأعلى من صوت البواري = جعلك يالأخضر تديهم كلهم عشرة صفاري
تراني استحي أطلع وأنا راكب حماري = أخش السيارات أتمنى البورش والا الفراري
وعندنا حواء في عالمها عالم إزدهاري = عالم يفوق الوصف كيف أوصف إنبهاري
في الأزياء أختار فستاني وأتنقى إكسسواري = أروح لصاحبتي تشوف وأقلها معليش لا تغاري
شعري منفوش وشكلو زي عش الحباري = في التسريحات أتعلم كيف أصفف شعري بإستشواري
أبغى أمكيج وجهي أبغى أطلي أظفاري = أبغى رشة عطر أبغى أخفي إسمراري
في المطبخ أتعلم كيف أسوي رز بخاري = المقادير رز لحم شرائح وشوية بهارات وكاري
ديكورات أثاث غرف نوم شغل عقاري = خش القسم وصدقني ما تحتاج مهندس إستشاري
أسرار الزوجية يا ناس شي شعلل بناري = للبالغين فقط وإنتبه إنت بداخل فرن حراري
أحافظ على صحتي وأداوم على إفطاري = بس على خفيف لأنو السمنة سبب أضراري
قريت عن البطل وعن الفارس المغواري = في القصص حكاوي وروايات تذهل القاري
عندي شي منقول ومو من بنات أفكاري = في القوافي أطرحها لا يجي من يقلل بمقداري
قصايد مسموعة إحساسها بسمعي عن أبصاري = شعر صوتي أصوات أعذب من طير الكناري
عذب الكلام كتبت فيه خواطري وأشعاري = من رومانسي و قصايد وشعر الحواري
برذاذ المطر بعزيمتي وإصراري = أحاول أبدع وبكرة الكل يقطف من ثماري
ألعاب فيديو مين يبغى يلعب مين يباري = نتحدى في البلاي ستيشن والنتندو وحتى الأتاري
في الموبايل نوكيا سوني أريكسون ياري = موتورولا فيليبس شارب و بلاكِ باري
نغمات جوالي من أناشيد المنشد مشاري = يوم أنشد يا عالم إلا صلاتي وإستغفاري
بلوتوث فضايح مقاطع مضاربة عراري = رقص مقالب عجايب ومشهد فيديو إنتحاري
برامج جوال ميديا وسائط وبرنامج راداري = وهدا برنامج ما ينفع إلا بجوال هنغاري
ثيمات جوال خلفيات ورسم كاريكتاري = لوحات مناظر طبيعة خلابة وفن معماري
ألعاب جوال ألعب وأنا داخل مضماري = بس بشويش لا يصيح الموبايل كسرت أزراري
وسائط رسائل أرسل لكل اللي بجواري = حبايب قلبي لا يحرمني منكم يا كل أنواري
فضائي آخر حلاوة وأنا وسط أقماري = أقلب بالريموت هنا وهناك أدور شي سهاري
كروت ستالايت سكاي ستار كرت إعصاري = بنكل توين هاند فري مافي شي إحتكاري
شوف الهيوماكس والدريم بوكس بمنظاري = فك شفرات وخط نت شغلو دبلة بخنصاري
أجهزة أخرى فيها الكويس وفيها التجاري = سترونج سكاي إكس هيومانس بريماري
منتديات فبوليشن فيها المفضل من إصداري = إصدار محمي لكل من يهدد أمني وإستقراري
هاكات تلاتة سبعة أكواد معظمها بنافباري = بهاك نسخة الإعلانات عارض أنا أسعاري
هاكات تلاتة تمانية تستاهل درع تذكاري = فيها الحماية دليل نعطيها تقييم معياري
عندي منتدى ونفسي بإستايل خنفشاري = إستايلات مجانية فري أحافظ على درهمي وديناري
موقعي صار فارغ ونحو الهاوية إنحداري = أخش السكربتات ألقى اللي يساعد على إشهاري
أصحاب المواقع صحيح عنكم إنقطع تياري = لكن بالبرامج والمفيد ما أنحرف عنكم مساري
عروض الشركات فيها بياع وشاري = سيرفرات ريسلرات أسدد وأدفع إيجاري
دعايا وإعلان توسع فيها إنتشاري = بعد ما كان موقعي من المواضيع عاري
شروحات برامج ما تحتاج شرح ثرثاري = شي مشروح وما أحتاج من يرد على إستفساري
برامج نادرة الروابط مخفية والرد إجباري = بعد الرد سوي تحديث والتحميل جاري
نظام التشغيل عندي فيستا نظام إختصاري = جمع بين اكس بي ومالينيوم بطابع إنحصاري
دخلت الجرافيكس أتعلم كيف أصمم شعاري = كيف أدمج كيف أطبق كيف أصمم من إبتكاري
في دروس الفوتو تعلمت إيش أدخل بإيطاري = وكيف أسوي تأثير وكيف أسوي ضوء إنكساري
دورة تعليم الفوتو أعلن فيها دوامي وإستمراري = أطبق وبعد التطبيق أحصل على عشر أعشاري
توبيكات شوق من بُعدك حبيبي ذبلت أزهاري = توبيكات حب تعال حبيبي أرتوي من عذب أنهاري
دخلت قسم المشرفين أصدر قراري = يا جماعة شدو حيلكم هذا قرار إداري
مشرف جديد بس للآسف الخبرة إفتقاري = في دليل المشرفين أتعلم كيف ابتدي مشواري
في التجارب أحاول أنجح في إختباري = كيف أغلق كيف أعدل كيف أعطي إنذاري
تايه وتصيح ساعدوني قبل إنهياري = في الطلبات بتلقانا موجودين وقت الطواري
تشاجرت مع الاعضاء وتعديت أطواري = روح البلاغات بلغ عني وعن شجاري
دليل الأعضاء لأعضائي وزواري = وبداية الرحلة إنك تقلع من مطاري
دحين خالفت الناس وقل إعتباري = في المحذوف موضوعي حذاري حذاري